Нийслэлийн цэцэрлэгт хамрагдах хүсэлтийг энэ оны 08 дугаар сарын 01-нээс E-Mongolia цахим системээр авч эхэлсэн. Бүртгэл энэ сарын 20-ны өдрийг дуустал үргэлжлэх юм байна. Улаанбаатар хотод цэцэрлэгийн насны 142,798 хүүхэд байгаа бөгөөд үүнээс 2 настай 33,142 хүүхэд байна.

Хэрвээ цахим системээр бүртгүүлэх боломжгүй бол харьяа дүүргийн цэцэрлэг дээр зөвлөгөө, дэмжлэг үзүүлэх ажлын хэсгүүд ажиллаж байгаа аж.

Хүүхдээ цэцэрлэгт хамруулах гэж байгаа бол дараах зөвлөмжийг анхааруулжээ.
-Өөрийн болон хүүхдийнхээ хаягийн бүртгэл, мэдээллийг нягталж, баталгаажуулсан байх
-Таны хүүхэд өнгөрсөн жил цэцэрлэгт хамрагдсан бол тухайн цэцэрлэгтээ “Үргэлжлүүлж явах” эсэх сонголтыг хийх
-Хэрвээ та шилжилт хөдөлгөөнийг энэ хугацаанд хийх бол хүсэлт хүлээн авах хугацаанд баталгаажуулсан байх ёстойг анхаарна уу.

Сонирхуулахад, Боловсролын багц хууль болон бусад 30 гаруй хуулийн заалтыг Улсын Их Хурал 2023 оны 07 дугаар сарын 07-нд шинэчлэн баталсан. Үүнийг дагаад гарах холбогдох 170 гаруй дүрэм журмыг шинэчлэн боловсруулж байгаа юм байна.