0-3 хүртэлх нас бол “Хүний хөгжлийн алтан үе”
Өнөөдрийн тоо бол 0-3 хүртэлх насны хүүхэд. Энэ насыг онцолсны учир нь 0-3 хүртэл насны хүүхэд бол “Хүний хөгжлийн алтан үе” дээрээ явж байгаа үе юм. Энэ үеийг ургийн үе, 12 сар хүртэлхийг нялх нас, 13-36 сарыг балчир нас гэж ангилдаг байна. 0-3 хүртэлх насны хүүхдэд асаргаа, хайр, халамж хамгийн чухал хэрэгцээ нь байдаг бөгөөд энэ үеийг Хүний хөгжлийн алтан үе буюу амьдралын эхний 1000 хоног хэмээн нэрлэдэг. Яагаад Алтан үе гэж онцолсныг зарим жишээгээр дурдъя. Тухайлбал, нярай хүүхэд 86 тэрбум мэдрэлийн эстэй төрдөг бөгөөд энэ нь хүний тархинд насан туршид нь бий болох бүх мэдрэлийн эсийн тоотой бараг тэнцүү гэсэн үг юм. Нярай хүүхдийн мэдрэлийн эсүүд 50 тэрбум холбоосоор холбогддог бөгөөд 3 нас хүрэхэд энэ тоо 1000 тэрбумд хүрдэг аж. Энэ мэдрэлийн эсийн холбоос нь тухайн хүний зан төлөвийг бүхэлд нь тодорхойлдог байна. Тиймээс л энэ үеийг “Хүний хөгжлийн алтан үе” хэмээн онцолжээ. Мөн асран хамгаалагчийн асаргаа, хай, халамж юу юунаас чухал болохыг НҮБ-ын Хүүхдийн сангаас онцолсон байдаг.
