Манай улсад төрийн өмчийн 705, хувийн 180 сургууль үйл ажиллагаа явуулж байна

Манай улсад 885 Ерөнхий боловсролын сургууль байгаагаас 705 нь төрийн өмчийнх, 180 нь хувийн сургууль. Тэгвэл өнгөрсөн хичээлийн жилд улсын хэмжээнд 1-р ангид 74,367 хүүхэд элсэн суралцсанаас 37 мянга нь нийслэл Улаанбаатарт байв. Сүүлийн дөрвөн жилд 72-78 мянган хүүхэд 1-р ангид элсэн суралцсан байна. Ирэх намар ч мөн энэ хэмжээний хүүхдүүд сургуульд элсэнэ гэсэн үг. Үүнийг дурдсаны учир нь өдийд хүүхдээ аль сургуульд оруулах, хэрхэн шалгалтад нь тэнцүүлж элсүүлэх, ирээдүйн боловсролд нь хэрхэн анхаарч, яаж хөрөнгө оруулах гээд аав ээжүүдийн санаа чилээдэг үе. Учир нь улсын сургуулийн боловсролын хүртээмж тэгш бус, нэг ангид 50-60 хүүхэд сууж хичээллэдэг зэрэг олон шалтгааны улмаас зарим аав ээжүүд дээр дурдсан 180 хувийн сургуульд хүүхдээ оруулахаар өдийд санаагаа чилээж суугаа.

Хувийн сургуулиудын ихэнх нь 1-р ангийн болон дунд, ахлах ангийн элсэлтээ 3-р сард эхлүүлдэг. Тиймээс хичээл сургуулийн элсэлтийн асуудал намар биш хавар өрнөдөг. Мэдээж бүх айлд биш шүү дээ. Зарим хувийн сургуулийн элсэлт аль хэдийн дүүрч бэлтгэх хөтөлбөрөө эхлүүлснийг сургуулиудын вэбсайт, пэйж болон сошиал орчин дахь мэдээллээс харж болно. Мэдээж хүн бүрийн бодол, харах өнцөг өөр ч өнөөдөр нийгэмд тулгараад буй чанартай, тэгш хүртээмжтэй боловсролын асуудал яах аргагүй хөндөх сэдэв юм.